政界激like張炳良勇武－平凡中的筆平凡

■張炳良新春原本就係喜慶日子、加上生日「喜上加喜」嘅話，斷估大部份人都唔會Say No，拒絕出席呢啲喜慶場合。點知特首梁振英喺呢方面，似乎真係完全出人意表，盛傳佢落令叫司局長唔好去民主黨喺年初九晚上舉行嘅廿周年黨慶，以杯葛回應白鴿黨嘅善意邀請，但更令人意想不到嘅係，房屋及運輸局局長張炳良當梁振英無到，一於毋忘初衷，堅持如期赴會。
雖然有啲政界口痕友話喎，張炳良今次咁「勇武」，肯肯定有自己嘅個人目的啦，尤其之前基本法委員會委員陳弘毅仲點名佢可以選特首喎，點會將自己嘅前途押喺對方身上？亦有識得張炳良嘅政界中人話呀，張炳良始終出身民主黨，對民主黨嘅感情始終較其他司局長更深，相信都係因此令佢咁堅持，雖則佢，其實已經唔係白鴿黨黨員。
但姑勿論張炳良有乜目的，佢明顯已經贏到唔少人嘅掌聲，尤其當佢毋忘初衷之際，同樣一早簽咗回條話會出席民主黨黨慶嘅食物及衞生局局長高永文，竟然縮沙話要跟團隊決定喎，將兩個人嘅取態做對比，明顯高下立見。
究竟梁振英，鍾唔鍾意張炳良唔跟佢旨意做嘢？花生友無從稽考；而日前同中大學者蔡子強傾呢個問題時，蔡子強則認為張炳良如期赴會做法「聰明少少」，「無謂將政黨同特首嘅（惡劣）關係，算到自己嘅賬上面」。
來源轉自：